Oleh: Tumanggung Arga
Ujar bubuhan tatuha urang bukit nang ba’utu (bagana) di Hulu Maratus sana. Waktu jaman Walanda bahari di Hulu Maratus sabalah salatan parnah hidup pajuang buhan bukit nang ngarannya Tamanggung Arga Sandipa Batangga Amas. Sidin nangini, banyak bangat baisi kajian alias sakti madraguna. Dari babarapa kasaktian sidin nangini, ada kajian sidin nang kadada urang baisi. Sidin bisa bapanderan wan buhan binatang nangapa haja, sampai-sampai sidin dikatujui wan buhan binatang nang ada di hutan maratus nitu. Sidin ne kajutu bangat manolongi buhan binatang nang lagi kalaparan, sidin kajutu maobati binatang nang lagi luka, masih banyak lagi kalakuan sidin nang dikatujui wan buhan binatang di sana.
Waktu sidin hidup, Tamanggung Arga Sandipa Batangga Amas nangini paling muar bangat wan buhan Walanda nang manjajah banua kita, sampai-sampai ka Hulu Maratus diharu-haru Walanda jua. Tapi sabatik-batik Tamanggung kada takutan wan Walanda. Setiap bubuhan Walanda datang ka hutan Maratus, sekong-ekong buhan Walanda nitu kadada lagi nang kawa hidupnya alias ji’un dapatnya Tamanggung wan kakawanannya. Gara-gara buhan Walanda banyak nang mati di tangan Tamanggung wan kakawanannya, lalu sidin diusah-usah walanda tarus (di DPO’kah jar urang wahini tu), tapi kada suah dapat.
Limbahnya nitu, Tamanggung Arga ni te garing, bisa jua pang lantaran sidin ne sudah tuha jua, limbahnya ni tu sidin ne ditangkap buhan Walanda, lalu di bawa ka markas Walanda di Barabai.
Tamanggung Arga Sandipa Batangga Amas dibawa ulih Walanda ka hutan handak ditimbak mati. Bajijir hudah buhan Walanda ne handak manimbak Tamanggung nang dipasung di batang puhun. Paharatannya handak ditimbak, mandadak tumbur, ribut wan gaduh bangat hutan di sakitar nitu, eh sakalinya napa jadi tumbur wan ribut, sakalinya bubuhan binatang-binatang nang ada di hutan nitu nang datang handak manulungi Tamanggung. Ada undau, hirangan, payau, baruang madu, bayi, ular sawa, wan banyak lagi binatang-binatang nang datang ka sana handak manulungi Tamanggung. Buhan Walanda nang malihat liwar banyaknya binatang nang datang mahamuk wan manyarang, labaram mamparas bukahan, ada nang tasarudup, ada nang tarujuk kakawanannya surang, ada nang bukah sambil takamih-kamih, pukuknya takutan bangat tu pang buhannya nitu. Limbahnya buhan walanda kadada lagi, hanyar buhan binatang nitu malapas pasungan nang manjarat tali di awak Tamanggung. Pahabisannya, Tamanggung salamat dari hukuman Walanda nang handak ditimbak mati karena ditulungi buhan binatang-binatang di sana.
(Nintu buhan tatuha di pahuluan maratus bakesah)
Tidak ada komentar:
Posting Komentar